Sjå nettseminar: Her fortel Sara Skilbred Fjeld i STAMI og Wenche Navarsete i Widerøe korleis ein kan skape betre arbeidsmiljø med En bra dag på jobb.
Luftfart er ein stor og mangfaldig bransje der mange arbeider på ulike måtar. Men i store delar av bransjen er folk på jobb utanom den normale arbeidstida, som er frå klokka 6 til 18.
Dei ugunstige arbeidstidene gjer at ein ofte er sliten etter ein arbeidsperiode.
– I periodar må ein jobbe sju dagar på rad, så då er det viktig å passe på at ein har det bra på jobb, slik at det er trygt, og at ein klarer dette over tid, seier Wenche Navarsete.
Ho er personalsjef for crew-medlemane i flyselskapet Widerøe. For dei tilsette her er arbeidstida heile tida eit samtaletema mellom dei tilsette og leiinga.
– Vi må jobbe kontinuerleg for å passe på at turnusane er forsvarlege. Dette må vi heile tida kartlegge, og vi vil at dei tilsette rapporterer korleis arbeidstida og andre forhold fungerer i praksis. Denne dialogen er kjempeviktig, seier Navarsete.
Fem utfordringar
STAMI har laga arbeidsmiljøverktøyet En bra dag på jobb, tilpassa spesifikt for luftfartsbransjen.
Verktøyet går gjennom dei fem viktigaste utfordringane i arbeidsmiljøet i denne bransjen, slik at tilsette og leiarar i ei verksemd kan finne utfordrinar og løysingar basert på dette.
I luftfart er dette dei fem mest framtredande utfordringane i arbeidsmiljøet:
- Omorganisering og endring
- Ugunstig arbeidstid
- Tryggleik
- Støy og vibrasjonar
- Innanding av støv, gass og kjemikaliar
Desse kan føre til ulike helseplager som hovudverk, søvnplager, å kjenne seg psykisk utmatta, og smertar i nakken, skuldrene og armane.
Samansett bransje
I luftfart er det vanskeleg å berre velje ut fem utfordringar, fordi bransjen er samansett.
Den består av tilsette som jobbar både på bakken og i lufta, og som dermed har litt ulik arbeidskvardag.
Tilsette i bransjen opplever også rollekonfliktar, låg leiarstøtte, avgrensa moglegheiter for fagleg utvikling, fysisk krevjande arbeid, og lite høve til å påverke eigne arbeidsoppgåver.
Omorganisering og endring
Luftfartsbransjen er sterkt konkurranseutsett, og flyselskapa er heile tida i endring for å overleve i denne konkurransen. Dette kan skape uvisse for tilsette som må ta omsyn til nye strukturar og rutinar.
Ugunstig arbeidstid
Anten dei jobbar i tårnet, på bakken eller i lufta, har tilsette i luftfart arbeidstider som strekkjer seg over heile døgnet.
Bakketilsette har skiftarbeid, men arbeidstida er regulert av norsk arbeidsmiljølov.
Flygande personell, derimot, er halde unna reglane i arbeidsmiljølova for arbeidstid. Dette inneber at dei ofte må arbeide lange dagar og veker, og at dei har ei stor grad av uføreseieleg og uregelmessig arbeidstid.
Tryggingskultur
Sikkerheten står alltid øvst på prioriteringslista i luftfarten, og både leiing og tilsette jobbar kontinuerleg for å halde oppe ein god tryggingskultur.
Likevel opplever dei tilsette også utfordringar som til dømes krevjande passasjerar og til tider aggressive situasjonar.
Støy og vibrasjonar
Det er høge lydnivå både innanfor og utanfor flya. Det å vere utsett for jamn støy i løpet av ein arbeidsdag kan medføre at ein blir trøytt og umerksam, noko som aukar risikoen for feil og ulykker.
Innanding av støv, gass og kjemikaliar
Det er først og fremst bakketilsette på teknisk avdeling eller ute på tarmac som er utsett for ulike kjemikaliar, gassar og støvpartiklar.
Men det finst også tilfelle der flyktige organiske samband eller såkalla fumes kan komme inn i cockpiten eller kabinen.