Trikloramin (NCl₃) blir danna når klor reagerer med nitrogenhaldige stoff som sveitte og urin i bassengvatnet. Stoffet er flyktig og kan fordampe til lufta.
– Det er i stor grad trikloramin som forårsakar den karakteristiske klorlukta i innandørs symjebasseng. Rørsle i vassoverflata frå symjarar, og vasspruteffektar og bølgjemaskiner, bidreg til at trikloramin blir overførte frå vatn til luft.
Det fortel STAMI-forskar Pål Graff, som har leia ein ny studie om trikloramin i symjehallar.
– Formålet var å kartleggje luftborne nivå av trikloramin i mange innandørs symjebasseng for å undersøkje moglege forskjellar mellom bassengtypar og faktorar som kan påverke luftkonsentrasjonen, legg han til.
Luftkvaliteten er ein viktig helsefaktor
Tidlegare studiar har knytt eksponering for trikloramin til symptom som hoste, rennande auge og i nokre tilfelle astma, særleg blant tilsette i symjehallar.
Den viktigaste eksponeringsvegen for trikloramin er å puste det inn. Luftkvaliteten i innandørs symjehallar er derfor ein viktig helsefaktor for både tilsette og besøkjande.
– Symjeinstruktørar, badevakter, teknisk personell og andre tilsette blir eksponerte under dei daglege arbeidsoppgåvene sine, i tillegg til befolkninga som bruker bassenga til fritidsbading eller symjeundervisning. Konkurransesymjarar og symjeklubbar kan vere spesielt utsette, sidan dei trenar i basseng mange timar i veka, seier Graff.
Store forskjellar
I studien undersøkte forskarane luftkvaliteten i 72 ulike innandørs symjebasseng i Sverige. Dei avdekte store variasjonar i nivåa av trikloramin, både mellom ulike bassengtypar og gjennom dagen. Dei høgaste nivåa av trikloramin fann dei i basseng for symjeundervisning og basseng i badeland.
Dei undersøkte også luftkvaliteten ved rehabiliteringsbasseng. Og desse skilde seg ut med mykje lågare verdiar, noko som truleg kjem av færre brukarar og rolegare aktivitet.
I bassenga brukt til trening og symjeopplæring var nivåa av trikkloramin høgare på kvelden enn tidlegare på dagen, medan rehabiliteringsbassenga viste høgare verdiar om vinteren enn om sommaren.
– Desse resultata viser tydeleg at eksponeringa varierer både gjennom dagen og mellom ulike typar basseng. Det kan tyde på at ventilasjonen i symjehallane ikkje fungerer optimalt, seier Graff.
Éi måling er ikkje nok
Han meiner at funna samla sett tyder på at éi enkelt måling ikkje gir eit representativt bilete av eksponeringa for trikloramin i ein symjehall.
– Resultata har noko å seie både for utforming av eksponeringsvurderingar i studiar av trikloramin og helse, og for overvaking av luftkvaliteten i symjehallar, konkluderer Graff.